പ്രവാചകന്‍ പ്രബോധനം ചെയ്ത കാതലായ കല്‍പ്പനകളില്‍ അദ്ല്‍(നീതി), ഇഹ്‌സാന്‍(ഗുണകാംക്ഷ), റഹ്മത്ത്(കാരുണ്യം) എന്നിവ പ്രാധാന്യമര്‍ഹിക്കുന്നു. കലഹം മൂലം ഛിന്നഭിന്നമാകുന്ന സമൂഹത്തില്‍ സമാധാനം കൊണ്ടുവരലായിരുന്നു അതുകൊണ്ട് ഉദ്ദേശിച്ചത്. ലൗകികമായ പ്രശ്‌നങ്ങളെച്ചൊല്ലി നിരന്തരം കലഹിച്ചുകൊണ്ടിരുന്ന ഗോത്രങ്ങള്‍ അനേകം ദൈവങ്ങളെ വെച്ചു പുലര്‍ത്തിയിരുന്നു. ഈ പശ്ചാത്തലത്തില്‍ പ്രവാചകന്‍ അവരോട് ഒരേയൊരു ദൈവമേ ഉള്ളൂവെന്ന് എന്ന് ഊന്നിപ്പറഞ്ഞു. സാഹോദര്യം സമൂഹത്തിന്റെ മുഖമുദ്രയാക്കേണ്ടതുണ്ടെന്ന് ആവശ്യപ്പെട്ടു. അല്ലാഹുവിന് മുന്നില്‍ സര്‍വസ്വം സമര്‍പ്പിക്കുന്നതിലൂടെ സമാധാനം കൈവരുന്നത് എങ്ങനെയെന്ന് പഠിപ്പിച്ചു. എല്ലാവര്‍ക്കും നീതി, എല്ലാവര്‍ക്കും ശാന്തി: അതിനുവേണ്ടിയുള്ളതായിരുന്നു അദ്ദേഹത്തിന്റെ എല്ലാ കല്‍പ്പനകളും. അതാകട്ടെ, സ്ത്രീകളെ മാറ്റിനിര്‍ത്തിക്കൊണ്ടുള്ളതായിരുന്നില്ല. അങ്ങനെയാണ്, അതുകൊണ്ടാണ് അദ്ദേഹം ദൈവദൂതനാകുന്നത്-അദ്ദേഹം ചെയ്തതെല്ലാം ഒരു ദൈവദൂതനേ ചെയ്യാന്‍ കഴിയൂ എന്നതുകൊണ്ട്.
അനീതിക്കും അതിക്രമങ്ങള്‍ക്കും എതിരെ പോരാടാന്‍ അദ്ദേഹം ആഹ്വാനം ചെയ്തു. സമൂഹത്തില്‍ കലഹം കുത്തിപ്പൊക്കുന്നത് അജ്ഞതയാണെന്ന് മനസ്സിലാക്കിയ അദ്ദേഹം എല്ലാവരും അറിവ് നേടണമെന്ന് ആവശ്യപ്പെട്ടു. അതിനുവേണ്ടിയാണ്, അറിവ് നേടിക്കൊണ്ടുള്ള സാമൂഹിക ഉന്നമനത്തിനുവേണ്ടിയാണ് പോരാടേണ്ടത്. അവനവന്റെ തന്നെ തെറ്റുകുറ്റങ്ങള്‍ക്കെതിരായുള്ള പോരാട്ടമാണത്; സമൂഹത്തില്‍ തിന്മക്കെതിരായുള്ള പോരാട്ടവും.
മനുഷ്യ ചരിത്രത്തില്‍ മഹത്തായ ഒരതിരടയാളമിടുന്നുണ്ട് മുഹമ്മദ് നബിയുടെ അധ്യാപനങ്ങള്‍. സ്ത്രീകളെ സംബന്ധിച്ചുള്ള പല പ്രശ്‌നങ്ങളിലും ഉത്കണ്ഠകളിലും ഊന്നല്‍ നല്‍കിക്കൊണ്ടുള്ള വ്യത്യസ്തമായ മൂല്യബോധങ്ങള്‍,ആലംബഹീനരെയും പാവങ്ങളെയും കൈപിടിച്ചുയര്‍ത്താന്‍ ഇസ്‌ലാമിനുള്ള താല്‍പര്യം ഒരു മതമെന്ന നിലയില്‍ അതിനെ ഉന്നതമാക്കുന്നു.
ബഹുഭാര്യത്വമാണ് (മുസ്‌ലിം പുരുഷന് നാല് ഭാര്യമാരാവാം എന്നാണ്) ഏറെ തെറ്റിദ്ധാരണ വളര്‍ത്തുന്ന വേറൊരു കാര്യം. ഗോത്രങ്ങള്‍ തമ്മില്‍ നടത്തിയിരുന്ന യുദ്ധങ്ങള്‍ കാരണം വിധവകളും അനാഥസന്താനങ്ങളും പെരുകിയ ഒരു കാലത്താണ് ബഹുഭാര്യത്വം പ്രോത്സാഹിക്കപ്പെട്ടത്. അതുമാത്രമല്ല, ഫ്യൂഡല്‍ സമൂഹത്തില്‍ ഒരു പുരുഷന് യഥേഷ്ഠം എത്ര സ്ത്രീകളെ വേണമെങ്കിലും ഭാര്യമാരാക്കാമായിരുന്നു. അതുകൊണ്ട് സ്ത്രീകളുടെ അഭിമാനം സംരക്ഷിക്കാനും മാന്യമായ ഒരു കുടുംബജീവിതം ഉറപ്പുവരുത്താനും വേണ്ടി ഭാര്യമാരുടെ എണ്ണം നാലില്‍ കൂടരുതെന്ന് നിഷ്‌കര്‍ഷിക്കുകയായിരുന്നു. അതോടൊപ്പം ഒരോ ഭാര്യയോടും സമഭാവനയോടടെ വേണം പെരുമാറാന്‍ എന്ന് അനുശാസിക്കപ്പെട്ടിരുന്നു. ഈ ഇടപാടകട്ടെ എക്കാലവും തുടരണമെന്ന് ഉദ്ദേശിച്ചിരുന്നുമില്ല. മുസ്‌ലിം സ്ത്രീകള്‍ക്ക് നിര്‍ഭയം ജീവിക്കാന്‍ അവസരമൊരുക്കിയിട്ടുള്ള മുസ് ലിം നാടുകളില്‍ ബഹുഭാര്യത്വത്തിനെതിരെ കഠിനവിമര്‍ശം ഉയരുന്നുമുണ്ട്.
പ്രവാചകന്റെ അധ്യാപനങ്ങള്‍ ഏറ്റവും വെറുക്കപ്പെട്ട വിധം വികൃതമാക്കപ്പെടുന്നത് അമേരിക്ക അക്രമിക്കപ്പെട്ട സെപ്റ്റംബര്‍ പതിനൊന്നിന് ശേഷമാണ്. അതോടെ ഇസ് ലാമികഭീകരാക്രമണം എന്ന പദാവലി എല്ലാവരും ഏറ്റുപാടിത്തുടങ്ങി. അനേകം നിരപരാധികള്‍ കൊല്ലപ്പെടുന്ന പ്രവൃത്തിയാണല്ലോ ഭീകരാക്രമണം. ഖുര്‍ആനാകട്ടെ, അപരാധെ ചെയ്യാത്ത ഒരാളെ കൊല്ലുന്നത് മാനുഷ്യകത്തെ മുഴുവന്‍ കൊല്ലുന്നതിന് സമമാണെന്നാണ് പഠിപ്പിക്കുന്നത്.
സമാധാനത്തിനു വേണ്ടി നിലകൊള്ളുന്ന ഇസ്‌ലാം, ആക്രമണം അഴിച്ചുവിടുന്ന പൈശാചികതയാണെന്ന് വരുത്തിത്തീര്‍ക്കലുണ്ടല്ലോ, ചരിത്രത്തിലെ വലുതായ ഒരു വിരോധാഭാസമാണ്. ഔന്നത്യമാര്‍ന്ന ഒരു മാനവികതക്കുവേണ്ടി നിലകൊണ്ട മാഹാനുഭാവനാണ് മുഹമ്മദ്. അദ്ദേഹത്തെപ്പോലുള്ള പ്രവാചകന്‍മാരുടെയും ഭഗവാന്‍ മഹാവീരന്റെയും ഗൗതമബുദ്ധന്റെയും യേശുക്രിസ്തുവിന്റെയും ഗുരുനാനാക്കിന്റെയും അവരെപ്പോലുള്ള മറ്റു മഹാത്മാക്കളുടെയും അധ്യാപനങ്ങളാണ് മാനവികമൂല്യങ്ങളുടെ ശ്രേയസ്സുയര്‍ത്തിയത്. ഇന്ന് ആഗോള സാഹചര്യം ഐശ്വര്യപൂര്‍ണ്ണമാവണമെങ്കില്‍ മുഹമ്മദ് നബിയെക്കുറിച്ച് ശരിയായ അറിവ് ലഭിക്കേണ്ടത് അനിവാര്യം.