‘പാപമോചനവും സമാധാനവും തേടി ആദമിന്റെയും ഹവ്വയുടെയും മക്കൾ’: ഉംറ നിർവ്വഹിക്കാൻ മക്കയിലെത്തി എ.ആർ റഹ്‌മാൻ
“അപാരമായ സമാധാനം, അൽഹംദുലില്ലാഹ്” എന്ന തലക്കെട്ടിൽ കഅ്ബയുടെ ചിത്രം എ.ആർ റഹ്‌മാന്റെ മകൾ റഹീമ റഹ്‌മാൻ ഇൻസ്റ്റാഗ്രാമിൽ പങ്കുവെച്ചു.
മക്ക: ഓസ്കർ പുരസ്കാര ജേതാവും സംഗീത സംവിധായകനുമായ എ.ആർ റഹ്‌മാൻ ഉംറ നിർവ്വഹിക്കാനായി മക്കയിലെത്തി. മക്കളായ റഹീമ റഹ്‌മാൻ, എ.ആർ അമീൻ എന്നിവരും എ.ആർ റഹ്‌മാന്റെ കൂടെ ഉംറ നിർവ്വഹിക്കാനെത്തി. “പാപമോചനവും സമാധാനവും ഉപാധികളില്ലാത്ത സ്നേഹവും തേടി ആദമിന്റെയും ഹവ്വയുടെയും മക്കൾ” എന്ന വിശേഷണത്തോടെ മക്കയിൽ വിശ്വാസികൾ കഅ്ബക്ക് ചുറ്റും വലം വെയ്ക്കുന്ന ദൃശ്യങ്ങൾ എ.ആർ റഹ്‌മാൻ തന്റെ ഇൻസ്റ്റാഗ്രാം അക്കൗണ്ട് വഴി പങ്കുവെച്ചു. എ.ആർ റഹ്‌മാന്റെ തന്നെ ‘കുൻ ഫയകുൻ…’ എന്ന ഹിറ്റ് ഗാനത്തിന്റെ പശ്ചാത്തലത്തിലാണ് മക്കയിലെ ഹറം പള്ളിയിലെ ദൃശ്യങ്ങൾ ഇൻസ്റ്റാഗ്രാമിൽ പങ്കുവെച്ചത്.
“അപാരമായ സമാധാനം, അൽഹംദുലില്ലാഹ്” എന്ന തലക്കെട്ടിൽ കഅ്ബയുടെ ചിത്രം റഹീമ റഹ്‌മാനും ഇൻസ്റ്റാഗ്രാമിൽ പങ്കുവെച്ചു.
മക്കയിലെ അൽ മർവ്വ റയ്ഹാൻ ഹോട്ടലിലെ എക്സിക്യൂട്ടിവ് ഷെഫ് ഹക്കീമുൽ ഇസ്‌ലാമുമൊത്തുള്ള സെൽഫി ചിത്രവും എ.ആർ റഹ്‌മാന്റേതായി പുറത്തുവന്നിട്ടുണ്ട്. ഹക്കീമുൽ ഇസ്‌ലാം തന്നെയാണ് തന്റെ ഫേസ്ബുക്ക് അക്കൌണ്ട് വഴി ചിത്രം പുറത്തുവിട്ടത്. എ.ആർ റഹ്‌മാന്റെ ഉംറ ദൈവം സ്വീകരിക്കട്ടെയെന്നും അദ്ദേഹം ഫേസ്ബുക്കിൽ കുറിച്ചു.
1989ലാണ് എ.ആർ റഹ്‌മാനും കുടുംബവും ഇസ്‌ലാം സ്വീകരിക്കുന്നത്. 2004ൽ ആദ്യമായി എ.ആർ റഹ്‌മാൻ ഹജ്ജ് നിർവ്വഹിച്ചു. 2006ൽ എ.ആർ റഹ്‌മാനും മാതാവ് കരീമയും രണ്ടാം തവണ ഹജ്ജ് നിർവ്വഹിച്ചു.
