ഡച്ച് ഫുട്ബോൾ ഇതിഹാസം ക്ലാരൻസ് സീഡോർഫ് ഇസ്‌ലാം സ്വീകരിച്ചു

ആംസ്റ്റർഡാം: ഡച്ച് ഫുട്‌ബോൾ ഇതിഹാസം ക്ലാരൻസ് സീഡോർഫ് ഇസ്‌ലാം സ്വീകരിച്ചു. എ.സി മിലാൻ, റയൽ മാഡ്രിഡ്, അജാക്‌സ് തുടങ്ങിയ മുൻനിര ക്ലബ്ബുകളുടെ മധ്യനിര താരമായിരുന്നു സീഡോർഫ്.

”മുസ്‌ലിം കുടുംബത്തിൽ ചേർന്ന എന്റെ ആഘോഷത്തിനുള്ള എല്ലാ നല്ല സന്ദേശങ്ങൾക്കും നന്ദി”- സീഡോർഫ് ഇൻസ്റ്റഗ്രാമിൽ കുറിച്ചു. ”ലോകമെമ്പാടുമുള്ള എല്ലാ സഹോദരീ സഹോദരൻമാരുമായി ചേരുന്നതിൽ എനിക്ക് അതിയായ സന്തോഷമുണ്ട്. പ്രത്യേകിച്ച് ഇസ്‌ലാമിന്റെ അർഥം എന്നെ ആഴത്തിൽ പഠിപ്പിച്ച എന്റെ ഭാര്യ സോഫിയ. ഞാൻ എന്റെ പേര് മാറ്റിയിട്ടില്ല. അത് എന്റെ മാതാപിതാക്കൾ നൽകിയതുപോലെ ക്ലാരൻസ് സീഡോർഫ് എന്നു തന്നെ തുടരും. ഞാൻ എന്റെ എല്ലാ സ്‌നേഹവും ലോകത്തെ എല്ലാവർക്കുമായി അയക്കുന്നു”-സീഡോർഫ് കുറിച്ചു.

മൂന്ന് വ്യത്യസ്ത ക്ലബ്ബുകൾക്കായി ചാമ്പ്യൻസ് ലീഗ് കിരീടം നേടിയ ഏക കളിക്കാരനാണ് സീഡോർഫ്. കരുത്തും വേഗതയുമുള്ള കഠിനാധ്വാനിയായ കളിക്കാരനെന്ന് അടയാളപ്പെടുത്തപ്പെട്ട സീഡോർഫ് 87 കളികളിൽ ദേശീയ ടീമിനായി ബൂട്ടുകെട്ടിയിട്ടുണ്ട്. മൂന്ന് യുവേഫ യൂറോപ്യൻ ഫുട്‌ബോൾ ചാമ്പ്യൻഷിപ്പുകളിലും (1996, 2000, 2004) 1998ലെ ലോകകപ്പിലും കളിച്ചിട്ടുണ്ട്.

”എന്റെ പ്രണയം ക്ലാരൻസ് സീഡോർഫ് മുസ്‌ലിം കുടുംബത്തിൽ ചേരുന്ന ഈ സവിശേഷവും മനോഹരവുമായ നിമിഷത്തിന്റെ ഭാഗമാവാൻ കഴിഞ്ഞതിൽ എനിക്ക് അതിയായ സന്തോഷവും അഭിമാനവുമുണ്ട്. നിങ്ങൾ തുടർന്നും അനുഗ്രഹിക്കപ്പെടുകയും ലോകത്തെ പ്രചോദിപ്പിക്കുകയും ചെയ്യട്ടെ”-സീഡോർഫിന്റെ ഭാര്യ സോഫിയ ഇൻസ്റ്റഗ്രാമിൽ കുറിച്ചു.