കോഴിക്കോട്: ഡയലോഗ് സെന്റർ കേരളയുടെ ‘രചനാ പുരസ്കാരം’ പ്രമുഖ എഴുത്തുകാരനും വാഗ്മിയുമായ വാണിദാസ് എളയാവൂരിന് നൽകാൻ തീരുമാനിച്ചതായി ഡയലോഗ് സെന്റർ കേരള ഡയരക്ടർ ശൈഖ് മുഹമ്മദ് കാരകുന്ന് അറിയിച്ചു.
അധ്യാപകൻ, പ്രഭാഷകൻ, എഴുത്തുകാരൻ, സാംസ്കാരിക നായകൻ എന്നീ നിലകളിൽ അറിയപ്പെടുന്ന വാണിദാസ് വിശിഷ്ടമായ ഗ്രന്ഥങ്ങൾ രചിച്ച് വൈജ്ഞാനിക മേഖലക്ക് നൽകിയ സേവനത്തെ ആദരിച്ചു കൊണ്ടുള്ളതാണീ പുരസ്കാരമെന്ന് ഡയലോഗ് സെന്റർ കേരള ഡയറക്ടർ അറിയിച്ചു. മത പാരസ്പര്യങ്ങളുടെയും സൗഹൃദങ്ങളുടെയും മൂലശിലയാവുന്നതാണ് വാണിദാസിന്റെ സാഹിത്യ രചനകളെന്ന് ഡയലോഗ് സെന്റർ ഡയറക്ടർ പറഞ്ഞു. ഡിസംബർ 31 വെള്ളിയാഴ്ച വൈകീട്ട് 4.30ന് കണ്ണൂർ ചേംബർ ഹാളിൽ നടക്കുന്ന സാംസ്കാരിക സമ്മേളനത്തിൽ കെ സുധാകരൻ എം.പി പുരസ്കാരം കൈമാറും. ജില്ലാ പഞ്ചായത്ത് പ്രസിഡണ്ട് പി.പി ദിവ്യ, കണ്ണൂർ കോർപറേഷൻ മേയർ അഡ്വ. ടി.ഒ മോഹനൻ, മുൻമന്ത്രി രാമചന്ദ്രൻ കടന്നപ്പള്ളി എം.എൽ.എ, സജീവ് ജോസഫ് എം.എൽ.എ, ഗൾഫ് മാധ്യമം ചീഫ് എഡിറ്റർ ഹംസ അബ്ബാസ്, ഫാദർ ജോസഫ് കാവനാടിൻ തുടങ്ങിയവർ ചടങ്ങിൽ പങ്കെടുക്കും.
വിശിഷ്ട അധ്യാപകനുള്ള രാഷ്ട്രപതിയുടെ അവാർഡ് ലഭിച്ച മുൻ കേരള സാഹിത്യ അക്കാദമി അംഗമായ വാണിദാസ് പ്രവാചക കഥകൾ, മരുഭൂമിയിൽ പിറന്ന മഹാ മനുഷ്യൻ, ഖുർ‌ആന്റെ മുന്നിൽ വിനയാന്വിതം, ഇസ്‌ലാം സംസ്കൃതി: ചില സൗമ്യ വിചാരങ്ങൾ, ജിഹാദ് സത്യവേദത്തിന്റെ ആത്മഭാവം, വേദഗ്രന്ഥം വഴി നയിക്കുമ്പാേൾ, പുണ്യം പൂത്തിറങ്ങുന്ന റമദാൻ, ഖുർആൻ സർവാതിശായിയായ വേദഗ്രന്ഥം തുടങ്ങിയ നിരവധി ഗ്രന്ഥങ്ങൾ മലയാളത്തിന് നൽകി. കൂടാതെ ഖുർആൻ ലളിത സാരം, മുഹമ്മദ് നബി മാനുഷ്യകത്തിന്റെ മഹാചാര്യൻ എന്നിവയുടെ സഹഗ്രന്ഥകാരനുമാണ്. രചനയിൽ ഒരനുശീലനം എന്ന പ്രബന്ധത്തിന്‌ ഇൻസ്റ്റിറ്റ്യൂട്ട് ഓഫ് എഡുക്കേഷൻ അവാർഡ്, ഇന്ദിരാഗാന്ധി സദ്ഭാവന അവാർഡ്, മൈസൂർ മലയാള സാഹിത്യ വേദിയുടെ കൈരളി അവാർഡ്, കെ.സി അബ്ദുല്ല മൗലവി ചാരിറ്റബിൾ ഫൗണ്ടേഷൻ അവാർഡ്, തിരുവനന്തപുരം മുസ്‌ലിം അസാേസിയേഷൻ അവാർഡ്, തുടങ്ങിയ പുരസ്കാരങ്ങൾ അദ്ദേഹം നേടിയിരുന്നു.
ഭാര്യ: പരേതയായ കെ.എം യശോദ. മക്കൾ: അമർനാഥ്, അജിത്കുമാർ, യശോധരൻ, ധർമേന്ദ്രൻ. മരുമക്കൾ: ശാന്തി, വിദ്യ, മായ, ആശ.