Q 1. വിവിധതരം മനുഷ്യരെ സൃഷ്ടിച്ചത് ദൈവം തന്നെയാണല്ലോ (ഉദാ: പാവപ്പെട്ടവനും പണക്കാരനും, ആരോഗ്യവാന്‍, വികലാംഗന്‍, മറ്റ് പ്രയാസപ്പെടുന്നവര്‍) ഇതില്‍ ദൈവത്തിന്റെ കാരുണ്യം എവിടെയാണ്?
-ശശി, കോഴിക്കോട്.
Answer: ഭൂമിയില്‍ മനുഷ്യാവസ്ഥകളില്‍ വമ്പിച്ച അന്തരമുണ്ട്. കണ്ണുള്ളവര്‍, ഇല്ലാത്തവര്‍, കൈകാലുകളുള്ളവര്‍, ഇല്ലാത്തവര്‍, ആരോഗ്യവാന്മാര്‍, രോഗികള്‍, കരുത്തര്‍, ദുര്‍ബലര്‍, പ്രതിഭാശാലികള്‍, സാമാന്യബുദ്ധി കള്‍, പണ്ഡിതന്മാര്‍, പാമരന്മാര്‍, പണക്കാര്‍, പാവങ്ങള്‍ ഇങ്ങനെയിങ്ങനെ എന്തെല്ലാം വൈവിധ്യതകള്‍!വിവേചനങ്ങള്‍! പ്രത്യക്ഷത്തില്‍ കടുത്ത അനീതി! സ്ത്രീകളും പുരുഷന്മാരും പോലും ഉണ്ടാവുന്നത് കൊടിയ വിവേചനമാണ്.പുരുഷന്മാര്‍ക്ക് ഇല്ലാത്ത പ്രയാസം സ്ത്രീകള്‍ മാസത്തില്‍ നാലഞ്ചുദിവസം അനുഭവിക്കണമല്ലോ. ഗര്‍ഭം ചുമക്കുകയും പ്രസവിക്കുകയും വേണം. ഇത്തരം പ്രയാസങ്ങളൊന്നും പുരുഷനില്ല.
അതിനാല്‍ കൃത്യമായ നീതിയും സമത്വവും തുല്യതയും ഉണ്ടാകണമെങ്കില്‍ ലോകത്തുള്ള എല്ലാ മനുഷ്യരും ഒരേകാലത്ത്, ഒരേ ഭൂപ്രദേശത്ത്, ഒരേ കാലാവസ്ഥയില്‍, ഒരേ ശരീരപ്രകൃതിയോടെ, ഒരേ ബുദ്ധി ശക്തിയോടെ, ഒരേ നിറക്കാരായി, ഒരേ സാമ്പത്തികാവസ്ഥയില്‍, ഒരേ മാതാപിതാക്കളുടെ മക്കളായി, പുരുഷന്മാരോ സ്ത്രീകളോ മാത്രമായി ജനിച്ച് ജീവിക്കേണ്ടിവരും. സ്ത്രീയും പുരുഷനും പോലും ഉണ്ടാവരുതെന്നര്‍ഥം.ഇത് അപ്രായോഗികവും അസാധ്യവുമാണെന്ന് പറയേണ്ടതില്ലല്ലോ.
അപ്പോള്‍ ദൈവത്തെ മാറ്റി നിര്‍ത്തിയാലും വ്യത്യസ്ത കാരണങ്ങളാല്‍ ഇവിടെ പ്രയാസമനുഭവിക്കുന്നവര്‍ക്ക് എങ്ങനെയാണ്, എവിടെ നിന്നാണ് നീതി ലഭിക്കുക? ഉദാഹരണമായി കണ്ണില്ലാത്തവര്‍ അനുഭവിക്കുന്ന കൊടിയ കഷ്ട നഷ്ടങ്ങള്‍ക്ക് എന്താണൊരു പരിഹാരം? മരണത്തോടെ ജീവിതം ഒടുങ്ങുമെങ്കില്‍ ഇവിടെ അവരനുഭവിക്കുന്ന വിവേചനങ്ങള്‍ക്കും അനീതികള്‍ക്കും ഒരു പരിഹാരവുമില്ല.
എന്നാല്‍ മരണത്തോടെ ജീവിതം ഒടുങ്ങുകയില്ലെന്ന് ഇസ്‌ലാം പഠിപ്പിക്കുന്നു; ഭൂമിയിലെ കര്‍മങ്ങള്‍ക്കെല്ലാം അര്‍ഹമായ പ്രതിഫലം ലഭിക്കുന്ന പരലോകമുണ്ടെന്നും.
ഇവിടെ ഓരോരുത്തര്‍ക്കും ലഭ്യമായ സാധ്യതയനുസരിച്ചാണ് അവരുടെ ബാധ്യത. അതിനാല്‍ കണ്ണുള്ളവരുടെ അത്ര ബാധ്യത കണ്ണില്ലാത്തവര്‍ക്കില്ല. കരുത്തന്റെ ബാധ്യത ദുര്‍ബലനോ ആണിന്റെ ബാധ്യത പെണ്ണിനോ പെണ്ണിന്റെ ബാധ്യത ആണിനോ ഇല്ല. ലഭ്യമായ സാധ്യതയ്ക്കനുസരിച്ചുള്ള ബാധ്യത പൂര്‍ത്തീകരിച്ചാല്‍ മരണശേഷം ശാശ്വതമായ സ്വര്‍ഗം ലഭിക്കും; ബാധ്യത പൂര്‍ത്തീകരിച്ചില്ലെങ്കില്‍ ശിക്ഷയും. അതിനാല്‍ ആരോടും അല്പം പോലും അനീതിയില്ല. അതിനാല്‍ ദൈവം പരമകാരുണികനും കരുണാനിധിയുമാകുന്നത് മരണശേഷം വിധിദിനം അഥവാ കര്‍മഫലം അനുഭവിക്കുന്ന പരലോകം ഉള്ളതുകൊണ്ടാണ്. അതിനാലാണ് വിശുദ്ധ ഖുര്‍ആന്‍ ഒന്നാം അധ്യായത്തില്‍ പരമകാരുണികനും കരുണാനിധിയുമെന്ന് ദൈവത്തെ വിശേഷിപ്പിച്ച തൊട്ടുടനെ വിധിദിനത്തിന്നധിപന്‍ എന്ന് പരിചയപ്പെടുത്തിയത്.
.
